Bakonmu A Yau

Matsalolin tsaro na kara ta’azzara a ƙasashen Afirka masamman a Sahel da tafkin Chadi, inda aka ga yadda Boko Haram ke zafafa kai hare-hare a sansanoni da cibiyoyin jami’an tsaro a jihar Barno, yayin da mahara masu ikirarin jihadi suka tsanata kai farmaki a ƙasashen Nijar da Mali da Burkina Fado, ko a ranar Alhamis ƴan ta’adda sun kashe sojojin Benin kusan 30 a wani hari da suka kai arewacin ƙasar, sai kuma wani hari da ƴan bindiga suka kai fadar shugaban ƙasar Chadi da gwamnati ta  daƙile. A tattaunawarsa da Ahmed Abba, Dr. Yahuza Ahmad Getso masanin tsaro a Najeriya, ya ce duk da yadda ƙasashen ke ikirarin yaƙi da matsalolin tsaro, ba su da cikakkun tsare-tsaren da suka dace a bangaren soji da tafiyar da gwamnati, halisama ba da gaske su ke yi ba.

Hukumomin sojin Jamhuriyar Nijar sun gabatar da wata sabuwar dokar da zata hukunta baƙin da ke shiga cikin kasar ba tare da halartattun takardu ba. Wannan ya biyo bayan zarge zargen da ake na samun wasu baki da ke yiwa kasar zagon kasa. Domin tattauna wannan batu, Bashir Ibrahim Idris ya tattauna da mai sharhi a kan Nijar, Abdoul Naseer, kuma ga yadda zantawarsu ta gudana. 

'Yan Najeriya na ci gaba da bayyana ra'ayoyi daban daban dangane da harin saman da sojoji suka kai a kan 'Yan sakai a Jihar Zamfara, wanda ya hallaka akalla mutane 15. Bashir Ibrahim Idris ya tattauna da masanin harkar tsaro kuma tsohon sojin sama Air Commodore Tijjani Baba Gamawa kan lamarin, kuma ga yadda zantawarsu ta gudana.   

A ranar Asabar ce Faransa ta mika sansanin sojinta na biyu a kasar Chadi ga mahukuntan kasar a wani bangare na janye sojojinta a karshen watan Janairu.Kimanin sojoji Faransa 100 ne suka bar sansanin Abéché a ranar Asabar, kafin janye na Djamena su kusan 1000.A tattaunawarsa da Ibrahima Timbi Bah, Editan sashin Fulatanci na RFI, kwamandan dakarun Faransa a Afrika Janar  Pascal Lanni ya yi karin haske kan ficewarsu daga Afirka. 

Masana tsaro na ci gaba da tsokaci kan harin da mayakan Boko Haram suka kai sansanin sojin Damboa a jihar Bornon Najeriya wanda ya yi sanadiyyar mutuwar sojoji da ƴan sa kai. Kan hakan ne wakilinmu Ƙaribullah Abdulhamid Namadobi ya tuntuɓi masanin tsaro Kyaftin Abdullahi Bakoji mai ritaya.Shiga alamar sauti, domin sauraron ciakkiyar tattaunawar.

A Najeriya jami’an tsaro na ‘Yan Sa-kai ko Vigilante ko kuma na ‘Civilian JTF’ da ke yankin arewa maso gabashin Najeriya na taka rawa wajen taimakawa jami’an tsaro na gwamnati wajen yaƙi da ta’addanci da sauran miyagun laifuka. Sai dai duk da ƙokarin jami’an tsaron na Sa-Kai ra’ayoyi sun banbanta, dangane da rawar da suke takawa, inda wasu ke yaba musu ɗari bisa ɗari, yayin da wasu ke neman a yi gyara kan tsarin ayyukansu la’akari da kura-kuran sukan tafka ta hanyar wuce gona da iri a wasu lokuta da dama.Kan haka Nura Ado Suleiman ya tattauna da masanin tsaro a tarayyar Najeriya, Dakta Yahuza Getso.

Ana ci gaba da jimamin mutuwar tsohon shugaban Amurka Jimmy Carter wanda ke shan jinjina saboda irin gagarumar rawar da ya taka wajen samar da zaman lafiya a yankin Gabas ta Tsakiya da kuma ingantan rayuwar talakawa a ƙasashen Afrika da suka haɗa da Najeriya da Nijar. Ambasada Abdullahi Bindawa, na ɗaya daga cikin jami’an da suka yi aiki kut da kut tare da Jimmy Carter, ga kuma abin da yake cewa kan marigayi a hirarsa da Abdurrahman Gambo AhmadKu latsa alamar sauti domin sauraren cikakkiyar hirarsu

Ƴan Najeriya na fatan ganin samun sauƙi a wannan shekara ta 2025, bayan da suka shiga wani yanayi na matsalin tattalin arziki a shekarar 2024 da muka yi bankwana da ita, sakamkon wasu matakai da gwamnatin shugaba Tinubu ta ɗauka, masamman janye tallafin man fetur da kuma barin naira ta ceci kanta a kasuwar canjin kuɗaɗe. Shugaban ƙasar Bola Tinubu dai ya ce gwamnatinsa za ta rage hauhawar farashi a shekarar 2025 ta hanyar haɓaka noma da tallafa wa masana'antu, danage da fatan da ƴan Najeriyar ke da shi da kuma hasashen masana dangane da farfadowa tattalin arziki a wannan shekara, Ahmad Abba ya tattauna da Farfesa Kabiru Isa Dandago na jami’ar Bayaro da ke Kano, kuma ga yadda zantawarsu ta gudana.

Ƙungiyar kare hakkin bil Adama ta ‘Amnesty International’, ta fitar da sakamakon binciken da ta gudanar akan zarge-zargen da ake yi wa Isra’ila na aikata kisan ƙare dangi a Gaza. Cikin rahoton wanda aka fitar da shi a birnin Kano dake arewacin Najeriya, Amnesty tace Isra’ila ta kashe mutane sama da dubu 40, ciki harda kananan yara dubu 13 a cikin shekara guda.Wakilinmu na Kanon Abubakar Abdulƙadir Ɗangambo ta tattauna da Daraktan kungiyar ta Amnesty a Najeriya Isa Sunusi.Shiga alamar sauti, domin sauraron cikakkiyar tattaunawar.

Ƙungiyar SERAP mai fafutukar yaƙi da cin hanci da rashawa a Najeriya, ta buƙaci shugaba Bola Ahmed Tinubu da mataimakinsa Kashim Shettima da ministoci da gwamnoni da su bayyana wa al’ummar ƙasar kadarorin da suka mallaka, a wani mataki na yaƙi da matsalar wawure dukiyar talakawa. A game da wannan batu, Abdurrahman Gambo Ahmad ya tattauna da shugaban CISLAC da ke yaƙi da rashawa a Najeriya, Auwal Musa Rafsanjani. Ku latsa alamar sauti don sauraron cikakkiyar tattaunawar.........

Rundunar Tsaron Najeriya ta mayar da martani kan kalaman shugaban soji na Nijar, bisa zarge-zargen da ya yi kan ƙasar na cewa tana haɗa kai da Faransa domin yi mata maƙarƙashiya. Latsa alamar sauti domin sauraren ƙarin bayanin da kakakin rundunar tsaron Najeriya Birgediya Janar Tukur Gusau ya yi wa wakilinmu na Abuja Mohd.Sani Abubakar...

A ‘yan kwanakin da suka gabata, hukumar yaƙi da cin hanci da rashawa ta ICPC a Najeriya ta fitar da rahoton cewa, kotun ƙolin ƙasar haɗi da wasu hukumomin gwamnati 14, sun gaza cin jarabawar nagarta da ɗa’a da ta ke yi, domin duba ayyukan rashawa a faɗin ƙasar a duk shekara. Hauwa Halliru Gwangwazo ta tattauna da masanin shari’a a ƙasar, Barista Ibrahim Abdullahi Cheɗi, kan yadda su ke kallon girman matsalar a mahangar su ta shari’a.Latsa alamar sauti domin sauraren yadda tataunawarsu ta kasance...

Mabiya addinin Kirista na cigaba da bukukuwan zagayowar ranar Kirsimeti a sassan duniya don tunawa da ranar haihuwar Yesu Al Masihu da aka yi a Bethlehem da ke kudu da birnin Qudus. Sama da shekaru dubu biyu ke nan mabiya addinin Kirista suka kwashe suna gudanar da wannan biki a duk fadin duniya, ta hanyar nuna farin ciki da ƙauma da tausayin juna da sadaukarwa da dai sauransu.Kan wannan Nura Ado Suleiman ya tattauna da Reverend Joseph Nahum, dake garin Maiduguri, wanda ya fara da yin tsokaci kan muhimmancin ranar ta Kirsimeti.Shiga alamar sauti, domin sauraron cikakkiyar tattaunawar.

Ƙasashen AES da suka haɗa da Nijar, Mali da kuma Burkina Faso sun yi watsi da ƙarin wa’adin watanni shidda da ECOWAS ta yi musu a makon jiya, kan lokacin ficewarsu daga cikin ƙungiyar a hukumance, rangwamen da zai fara aiki a watan Janairun dake tafe. Cikin sanarwar da suka fitar, ƙasashen uku sun sanar da baiwa rundunonin sojinsu umarnin zama cikin shirin kar ta kwana. Kan wannan Nura Ado Suleiman ya tattauna da Ambassada Abubakar Cika tsohon Jakadan Najeriya a ƙasar Iran. Ku latsa alamar sauti don sauraron cikakkiyar tattaunawarsu..................

Kasafin kuɗin Najeriya na cigaba da zama abin muhawara tun bayan da shugaba Bola Tinubu ya gabatar da shi a gaban ƴan Majalisun Dokokin ƙasar a makon jiya. Baya ga kason da aka ware don biyan bashi, da tsaro, da sauran fannoni, kuɗaɗen da aka warewa noma na daga cikin batutuwan da suka fi ɗaukar hankali, la’akari da cewar duk da muhimmancinsa, fannin ya gaza samun kashi biyu ko sama da haka, daga cikin kasafin na shekara mai zuwa da ya haura naira Tiriliyan 47. Kan haka Nura Ado Suleiman ya tattauna da Alhaji Muhammadu Magaji Sakataren tsare tsare na Ƙungiyar Manoman Najeriya.Ku latsa alamar sauti don sauraren cikakkiyar tattaunawarsu........

Hukumomin Najeriya sun ce mutane sama da dubu 600 'yan ta'adda masu garkuwa da mutane suka kashe daga cikin mutane sama da miliyan 2 da dubu 200 da suka yi garkuwa da su, yayin da kuma aka biya kuɗin fansa     r da ya kai sama da naira triliyan 2 da biliyan 200. Dangane da wannan rahoto mai tada hankali, Bashir Ibrahim Idris ya tattauna da masanin harkar tsaro Malam Yahuza Getso, kuma ga yadda zantawar tasu ta kasance.sai a latsa alamar sauti domin sauraren tattaunawar.

Hukumar da ke kula da al'adu ta Majalisar Ɗinkin Duniya ta UNESCO ta damƙawa Najeriya takaddar shaidar sanya bikin hawan Daba na Kano cikin manyan al'adun duniya masu matukar tasiri. Jim kaɗan bayan kammala miƙa shaidar wakilinmu a Abuja Isma’il Karatu Abdullahi ya tattanna da ministar al’adu ta Najeriya Hajiya Hannatu Musawa kan tasirin da wannan zai yi wa ƙasar. Ku latsa alamar sauti don sauraron cikakkiyar tattaunawar ta su......

Hukumar Yaki da Cin Hanci da Rashawa ta Najeriya EFCC ta kama ƴan damfara 792 da suka haɗa da Larabawa da ƴan China da Philippines a birnin Lagos, kamen da shi ne mafi girma da hukumar ta yi a rana guda kuma a lokaci guda. Darektan Hulɗa da Jama'a na EFCC Wilson Uwajaren ya ce, waɗannan mutanen sun shahara wajen damfara ta yanar gizo, inda suke ɓoye kamanninsu tare da gabatar da soyayya ta ƙarya domin yaudarar jama'a a sassan duniya.  Ku latsa alamar sauti don jin tattaunawar Abdurrahman Gambo Ahmad da mukaddashin darektan EFCC a Lagos, Mr. Michael Wetkaz.....

Ƴan Najeriya na ci gaba da bayyana damuwa a kan rashin isassun takardun kuɗaɗe a daidai lokacin da Babban Bankin ƙasar ke cewa akwai sama da naira triliyan 4 a hannun jama'a. Tuni rashin waɗannan kuɗaɗe ya shafi harkokin kasuwanci da kuma na yau da kullum a cikin ƙasar. Bashir Ibrahim Idris ya tattauna da masanin tattalin arziki Dr Isa Abdullahi. Ku latsa alamar sauti don jin yadda zantawarsu ta gudana......

Majalisar Ɗinkin Duniya ta shiga sahun ɓangarorin da suka fara nuna goyon baya ga sabuwar gwamnatin Syria, a wani yanayi da shugaba Abu Mohammad al-Julani da Firaminista Mohammed al-Bashir suka faro shugabancin riƙon kwarya gadan-gadan, kodayake kiraye-kiraye na ci gaba da tsananta don ganin jagororin sun yi taka-tsan-tsan a salon mulkinsu don kaucewa sake faɗawar ƙasar a yaƙi. Dangane da wannan Azima Bashir Aminu ta tuntuɓi masanain alaƙar ƙasashen ƙetare Abdulhakeem Garba Funtua, don jin ko wannan gwamnati za ta samu cikakken goyon bayan yammacin duniya.Ku latsa alamar sauti domin sauraren tattaunawarsu